FAILI LA HAKI YA GOSHENI KUFUNUA KANISA LA KWELI KWA MARA YA KWANZA NDANI YA UUMBAJI WOTE

WAKILI WA MUNGU KIZAZI CHA MUNGU

MIAKA1000 ELIYA

LANGO LA 5 BULI 5 (22/5/2016)

SHUKRANI

Leo ni siku ya ajabu; vizazi vyote vilisubiri kushuhudia siku ya leo kwa sababu ifuatayo kwamba: “Kila mwenye haki ambaye yuko mahali hapa, leo anaondoka na faili la hatima yake njema.” Nataka tumshukuru MUNGU kwa sababu kila mmoja ambaye yupo mahali hapa, ana faili lake la hatma njema.

Agano la kila mmoja mahali hapa lina hatma njema, lakini faili lako lilikuwa limefichwa mahali. Yaani karibu kila mmoja alikuwa amebadilishiwa faili, sasa leo faili lako linarejea kwa Damu ya Haki, Kweli na Hukumu!

Kuna maisha ambayo Kanisa tunaishi ambayo siyo ya kwetu, leo unarejeshewa maisha hasa unayostahili kwa Damu ya Haki, Kweli na Hukumu. Kuna maisha ambayo mlikuwa mnaishi wewe na kichwa wako au kanisa wako ambayo siyo yenu, leo mnarejeshewa yale maisha ambayo ni “original”, yaani stahiki yenu.

Kwa hiyo nataka tumshukuru MUNGU kwa kuwa lile faili la Kanisa lisilokuwa na mawaa wala kunyanzi, kwa wewe mwenye haki, unahama nalo leo unapokwenda Mlima wa Moto! Nadhani mnatambua kwamba huu ni mwezi wa Buli, na katika Zek.1:1-5 Neno la MUNGU linasema kwamba huu ni mwezi wa kila mmoja kumrudia BWANA.

Sasa siyo wewe tu bali kila kitu, mahali popote kilipowekwa ambapo si penyewe (yaani si mahali pake), sasa kinarejea mahali pake. Kwa hiyo, yule ambaye alikuwa amekaa na faili lako la hatma njema badala yako wewe, ajiandae kupokea faili lake la uovu anaostahili. Yale mambo mazuri ambayo MUNGU alikukusudia hata kabla hujaingia tumboni mwa mama yako, leo unaondoka nayo hapa.

Usiseme kwamba nimezoea kusema maneno matamu matamu hapa, lakini kile kipindi cha miezi minne cha mtihani kimekwisha! Niseme kwamba ilikuwa ni lazima tupite mahali tulipopita; na kipindi cha kupita hapo mahali tulipopita kimekamilika sasa. Sasa ni wakati wa kupata “certificate” (cheti) ya ushindi “original”, yaani halisi.

Nikiwaona namna hii huwa najisikia kumshukuru MUNGU sana kwa sababu kila ninayemuona hapa ameshinda; kwa sababu ilikuwa siyo rahisi kwamba uje kunisikiliza hapa bila “mic” (kipaza sauti). Lakini nataka utambue kuwa hata mimi sasa hivi nimepewa “mic” za mbinguni, hapa kwenye koo kuna “amplifier” ya mbinguni, na malaika wapo hapa wanarekebisha mitambo kila wakati. Nataka kila mmoja apaze sauti kumshukuru MUNGU kwa sababu siku ya leo unaondoka na lile faili (la hatma njema), na utaona ukifika Mlima wa Moto, utaanza kusikia faili la afya ya kiungu ndani yako.

+ Vile viungo ambavyo vilikuwa haviko sawa utaanza kuvisikia vikijipanga sawasawa;

+ Hali uliyokuwa unaisikia kazini ambayo siyo sawa utaionaa ikikaa sawa.

Nataka kila mmoja amshukuru MUNGU kwa kufika siku ya leo, Mwezi Buli, siku ya tano ya mambo makubwa, ibada ya kwanza katika mwezi wa kumrudia MUNGU.

Tunaposoma katika Kum.28:13 Neno la MUNGU kwa wenye haki linasema kwamba “... utakuwa juu tu, wala hutakuwa chini, utakuwa kichwa tu wala hutakuwa mkia.” Lakini ukiangalia hali halisi wengi walikuwa chini, sasa ninamshukuru MUNGU kwa ibada ya leo kwamba, aliyekuwa chini kwa maonezi tayari amekwenda juu! Na yule aliyekuwa juu, kwa kuwa alipandia mabega ya mwingine, na kwa kuwa amepandia faili la mwingine, matawi yote yametereza na yamekatikakatika! Hata shina la mti huo limeng’oka!

Nataka umshukuru MUNGU kwamba ulikuwa chini lakini tayari umekweda juu! Maana, ni haki yako, na MUNGU alisema kuanzia Kizazi cha Kwanza kwamba, kila mwenye haki lazima awe juu, na ni lazima awe kichwa; hata kama wewe ni kanisa umevaa “skirt” (sketi), lakini wewe utakuwa kichwa kila mahali. Nataka kila mmoja apaze sauti amshukuru MUNGU kwa sababu ukitoka hapa, naomba usijisikie kuwa unatembea kwa mguu, hata kama kiatu chako kinaonekana kina vumbi, hata kama mahali ulipopita leo kuna matope, bila kujali yote hayo, WEWE UKO JUU! Hilo ni Neno la BWANA la leo! Haijalishi unatoka kwenye familia maskini ya aina gani, hata kama babu na bibi na baba na mama walikuwa maskini wa kutupwa, hiyo siyo “issue” (chochote, yaani haina maana) tena leo! Nataka utambue sasa majira imefika kila aliyekuwa chini sasa anakwenda juu mradi unatenda kwa haki!

Ukisoma Mwa.15:8, kuna siku Abramu (yaani Ibrahimu wakati huo hajabadilishwa jina) alimuuliza MUNGU, kwamba MUNGU tazama ninakwenda bila mtoto, na umenipa mali nyingi, nani atarithi mali hii? MUNGU akasema utapata mtoto. Abramu akamuuliza tena, nitajuaje kwamba nitapata huyo mtoto? MUNGU akasema, nipe hiki, nipe hiki, yaani MUNGU mwenyewe akamwambia vitu alivyotaka vya kumpa kama sadaka. Sisi pia siku ya tano MUNGU alituambia kwamba iko sadaka moja tu iliyosimama mbele yake.

Kwa hiyo wewe unayelifuata Agizo la Kweli, Maono ya Kweli, na Ufunuo wa Kweli (na umeambiwa Ufunuo wa Kweli ni “original” na unatoka kwenye kilindi cha moyo wa MUNGU kila asubuhi): kuja kwako hapa leo ni sadaka imesimama mbele za BWANA kama ukumbusho; na kuamini kwako siku ya leo ni sadaka imesimama mbele za BWANA kama ukumbusho. Hilo ndilo limesababisha sasa sadaka zingine zote zilizokuwa zinasababisha wezi wa mafaili wakae badala yako waondoke na wewe ukae kwenye nafasi yako. Hivyo nataka kila mmoja apaze sauti amshukuru MUNGU kwa ajili ya hiyo sadaka moja peke yake ambayo imesimama mbele zake kama ukumbusho milele inayosababisha leo uondoke na faili la hatma yako njema!

Katika Isa.49:20 utakutana na watoto wengi wakikujia, vitu vingi vikikujia, na wewe utajikuliza maswali:

+ Hivi hawa watoto wote walikuwa wapi;

+ Hivi haya magari yalikuwa wapi;

+ Hivi hii mitaji ilikuwa wapi;

+ Hivi haya maduka yalikuwa wapi;

+ Hivi hizi super maket zilikuwa wapi;

+ Hivi haya maisha mazuri yalikuwa wapi;

+ Hivi huku kupendwa na kila mmoja ananichangamkia kulikuwa wapi? N.k.

Kumbe ni kwa sababu hatma yako imerejea! Usishangae utakapoona kila mmoja anakupungia mkono wa heri. Hata yule aliyekuwa anakuchukia atakuchekea, usishangae; Hata yule aliyekuwa hakusalimii ofisini sasa atakusalimia; Hata jirani ambaye ulikuwa unaamini kwamba hakupendi, sasa atakupenda.

Kwa maana ile hatma yako ya kwanza, ile ya kupendeza, ya kuwakawaka imerejea! Kwa hiyo, ulikuwa unaishi kama aliyefiwa, lakini sasa watoto wanakuja!

Unajua kwa nini hatma hii njema imerejea? Sababu ni hii, kwamba tumefundishwa siku ya tano iliyopita kwamba yule MUNGU aliyetuma wote vizazi vyote yuko hapa atekeleze maagizo yake yote.

+ Huu sasa ni wakati wa kutekeleza Agizo alilompa kerubi kabla hajaanguka, la kusimama kwenye Neno, kwenye imani, kwenye utakatifu na utii;

+ Ni wakati wa kutekeleza lile Agizo alilompa Adamu 1 kabla hajaanguka, la kuilima na kuitunza Bustani ya Edeni, na kutoshirikiana na mti wa ujuzi wa mema na mabaya. Kwa sababu hiyo vitu vizuri ni lazima vije.

+ Ni wakati wa kutekeleza lile agizo ambalo MUNGU alimpa Musa la kuhakikisha kuwa kila mmoja anatoka kwenye:

• utumwa wa magonjwa,

• utumwa wa mizimu,

• utumwa wa ujinga;

• utumwa wa upumbavu; na

• utumwa wa kila aina.

+ Ni wakati wa kutekeleza lile Agizo alilompa Eliya Mtishbi kwamba kila mmoja atembee na madhabahu ya Kanisa;

+ Ni wakati wa kutekeleza lile Agizo ambalo MUNGU alimpa YESU la kuhakikisha kwamba kila mmoja haonewi na ibilisi;

+ Ni wakati wa lile Agizo alilopewa Eliya AD2 la kumwabudu MUNGU katika Roho na Kweli kutekelezeka, misingi mibaya kuvunjika ndani yetu, na kila mmoja kusimama na Neno, Imani, Utakatifu na Utii; na pia kila mmoja kujengwa juu ya msingi wa toba.

Sasa kwa kuwa huyo aliyetuma wote vizazi vyote, amesimama hapa ingawa humuoni kwa macho, lazima wale watoto wote uliokuwa umeandikiwa na MUNGU, warejee kwako! Kama umenielewa na unafahamu basi paza sauti ya kushukuru nisikie!

Wiki iliyopita tulijifunza kwamba tumehamia rasmi katika Mt.21:41-43. Kuna maneno mawili makubwa pale ninayoyaunganisha na msingi wa shukrani asubuhi ya leo.

+ Ni wakati wa kila mmoja amzalie MUNGU matunda kwa wakati; hapa kuna neno “matunda” na “wakati”. Hivyo kuna faili la matunda ambalo nataka kila mmoja alipokee asubuhi ya leo, tena matunda yanayokuja kwa wakati. Wengine mlikuwa mnapokea haki, lakini wakati mwingine inacheleweshwa, haiji kwa wakati. Sasa MUNGU anataka, iwe ni mimi Miaka1000 au ni wewe, umzalie matunda kwa wakati. Lakini, huwezi kuzaa matunda wakati hupokei matunda. Kuna wengine hata mishahara hampati kwa wakati. Leo naanza na nyie ambao hampokei mishahara au matunda kwa wakati:

• Kama ni tunda la uponyaji unapokea sasa hivi;

• Kama ni tunda la kuoa / kuolewa unalipokea sasa hivi;

• Kama ni tunda la kupokea watoto unapokea sasa hivi;

• Kama ni matunda ya “promotion” unapokea sasa hivi;

• Kama ni matunda ya mtaji unapokea sasa hivi;

• Kama ni matunda ya kazi utapokea sasa hivi;

• Kama ni kukonda unajiona ni Michelin (kuna wengine wanachukia unene), wengine ni wanene, ikiwa unataka wembamba unapokea sasa hivi. N.k.

Kundi la kwanza

Wale ambao wanapata taabu kupokea faili la matunda kwa wakati. Ili ujue kwamba siyo Miaka1000 anaongea lazima upokee leo.

Kundi la Pili

Wale ambao kila wakati wanaona hatari ya kufa. Wakati mwingine unaogopa kwenda kupumzika unaona kama utafia usingizini. Faili la uzima wa milele ndiyo limerejea hapa. Kanisa leo limegeuka kuwa Treni inayokwenda kwa kasi. Anayesimama kwenye reli hiyo anaondolewa mara moja. Ikiwa tunaleta faili la matunda ni lazima tufute faili la mauti ambalo huwa linaharibu matunda.

KUFUTA ROHO YA MAUTI NDANI YA TAIFA

Tumefuta roho ya mauti ndani ya Kanisa, lakini katika wiki mbili mfululizo tumeona kwa kile kilichotokea kule Geita na Mwanza kwamba roho hii ipo ndani ya taifa pia. Ni kazi yetu sisi Kanisa kufuta roho ya namna ile. Tunafundishwa hivyo katika 1Tim.2:14, kwamba kabla ya yote tuombee walioko madarakani na amani. Katika Yer.29:7 Neno linasema lazima tuombee amani mahali tulipo. Hivyo sasa ni wajibu wetu kuhakikisha kwamba mauaji ya namna ile hayatokei tena. Nimekuwa pia nikiangalia kwa wale wanaoishi kwenye mapango ya Amboni, wanaishi kwa wasiwasi sana. Ni wajibu wetu sisi Kanisa kuhakikisha kwamba tunafuta wasiwasi, mashaka na hofu. Taifa ambalo lina madhabahu ya kweli halitakiwi liishi kwa wasiwasi.

Unapoangalia matokeo ya toba, ukaona jambo la hatari, wewe huangalii taarifa ya habari ufurahie na kuanza kujadili! Unaangalia taarifa ya habari ili MUNGU aseme na wewe kuna tatizo gani ili ulifute.

Sasa matukio kama hayo, kama kule Sengerema, majambazi waliingia nyumba moja wakawakatakata wote kwa mapanga, haitakiwi kurudia tena. Jambo lingine lilitokea Mwanza mjini juzi, hata kama lilitokea msikitini, lakini ni wajibu wetu kufuta mambo ya namna ile, kwa sababu tunataka wale waokoke. Neno la MUNGU linasema MUNGU hafurahishwi na kifo cha mwenye dhambi (Eze.33:11). Hivyo ni wajibu wetu kuhakikisha kwamba mambo hayo hayatokei tena.

Tutapita kwenye toba ili tulete polisi wa mbinguni waungane na polisi wanaoonekana kwenye macho haya, wawakamate hawa waovu, na wengine waliokuwa wanaota ndoto kufanya hivyo wasirudie tena!

Naomba nisahihishe kitu kimoja hapo. Wako wanaosema kwamba Wakili wa MUNGU anasimama madhabahuni na kusema kwamba “kwa damu ya Miaka1000” hii siyo kweli. Zab.89:14 imeweka wazi kwamba msingi wa kiti cha MUNGU ni Haki na Hukumu, na kweli iko mbele zake. Haki ni MUNGU, Kweli ni Neno / Kristo, na Hakumu ni Kanisa. Kwa hiyo nikisema kwa damu ya MUNGU mwenyewe inatakasa pote toka Mlimani mpaka juu sana.

UJUMBE: FAILI LA HAKI YA GOSHENI KUFUNUA KANISA LA KWELI KWA MARA YA KWANZA NDANI YA UUMBAJI WOTE

Zek.1:1-5 “Katika mwezi wa nane ... BWANA wa Majeshi asema hivi, nirudieni mimi asema BWANA wa Majeshi, ... msiwe kama baba zenu, …. rudini na kuziacha njia zenu mbovu”.

Kwa hiyo asubuhi ya leo ninayo furaha ya ajabu kwa kuwa faili la kila mmoja la kumrejea BWANA unalo mkononi tayari, na kila kitu kizuri ambacho MUNGU alikikusudia kimerejea kwako kwa Damu ya Haki, Kweli na Hukumu.

Nataka nimshukuru MUNGU kwamba kila mmoja wetu hapa anayetenda kwa haki, kama nilivyosema wakati wa kujenga msingi wa ibada ya Neno, ninakuhakikishia kwamba utakaporejea nyumbani utajiona si wa kawaida. Mahusiano yako na watoto, na mahusiano yako na majirani, kuanzia sasa hivi yamebadilika. Mahusiano yako na bosi wako pia yamebadilika. Kwa hiyo faili pia la taifa hili kulifunua Kanisa la kweli, limerejea.

Wale ambao mnafuatilia mafundisho, ukiangalia katika kile Kitabu cha Haki na Kazi ya Nabii, utaona mahali ambapo ametamka kuwa Tanzania ni Gosheni. Hivyo nikisema Gosheni nina maana ya Tanzania, nina maana ya taifa ambalo lina nuru wakati ambapo kwingine kuna giza. Kila mahali ambapo Kanisa hili litakwenda hakuna giza, bali kuna Nuru. Hivyo basi ile haki ya taifa hili kufunua Kanisa la kweli, faili hilo limerejea.

Huko nyuma ulikuwa:

+ Ukiwa KKT ulikuwa unajua dini hiyo ilizaliwa Ujerumani;

+ Ukiwa Assemblies of God ulijua dhehebu hilo limezaliwa Marekani;

+ Ukiwa Pentekoste ulijua kuwa dini hiyo ilizaliwa Sweden /

Scandinavia;

+ Ukiwa Aglican ulijua dini hii ilizaliwa Uingereza;

+ Ukiwa Baptist ulijua dini hiyo ilizaliwa Amerika (Marekani);

+ Ukiwa Presbyterian au Greek Orthodox, ulijua dini yangu hii ilizaliwa Uyunani;

+ Ukiwa RC ulijua dini yangu hii ilizaliwa Urumi. N.k.

Leo kibao kimegeuka; tena kuna kipindi tulikuwa tunaringishiana kwenye madhehebu, kwamba wewe dini yako ilitoka wapi? Wana utajiri kiasi gani? Wanawaletea misaada kiasi gani? Tulikuwa tunaringishana kwa sababu ya misaada. Lakini kuanzia leo tutazungumza kuhusu Kanisa la Kweli. Na haki ya taifa hili kufunua Kanisa la kweli, faili hilo limerejea. Somo hili lilikuwa halijafundishwa kwa sababu kila mmoja alikuwa amebadilishiwa faili.

Ukiona mataifa hayo leo ni matajiri ni kwa sababu yalizaa dini na madhehebu. Wakati unazaliwa kwenye ile dini, ukaandikishwa, ulipobatizwa ukaandikishwa, nafsi yako wewe hujui ilikwenda wapi! Ulipopokea lile koti, ukafurahia ile suti ya msaada kwa mmisionari, nguvu yako wewe hujui ilikwenda wapi! Leo nataka nimshukuru MUNGU kwamba Siloamu itakapokwenda haipeleki ukoloni, bali inapeleka amani.

Nataka ujue leo unapotoka hapa, kuna ambao mliandikiwa utajiri lakini mnaonekana maskini. Lakini leo ukitoka hapa wewe ni tajiri. Kuna ambao mliandikiwa watoto wengi lakini mnaonekana hamjazaa hata mtoto mmoja; leo ukitoka hapa ujue una watoto. Kuna wengine hapa mna vyeo vikubwa lakini mlikuwa mnaonekana wa chini sana. Lakini nakwambia ukitoka hapa leo nafasi yako imerejea. Kwa sababu lile faili la taifa kuwa na haki ya kufunua Kanisa la kweli limerejea. Hakuna kitu MUNGU alisubiri kama hiki.

Kuna Kuhani aliyekusudiwa awe na abiria wengi, lakini hata wawili walikuwa hawafiki. Kila wakati alikuwa anaomba abadilishiwe kituo, leo kibao kimegeuka.

Ni kwa sababu abiria wa huyo Kuhani walikuwa kwenye soka na wengine walikuwa kwenye volleyball, wengine walikuwa bado kilabuni, wengine walikuwa bado RC, na wengine walikuwa bado wako KKT, leo wanakuja! Kuna wengine mlikuwa mmeandikiwa masupa maketi makubwa makubwa, lakini hata ukianzisha kioski, kilikuwa hakidumu, kwa sababu ulikuwa umebadilishiwa faili. Leo limekuja la kwako!

Ushuhuda

Thamani Kizazi cha Nne, muimbaji, siku moja aliniuliza swali, kwamba mimi nimepewa kuwakamilisha waimbaji. Mbona mimi mwenyewe sijakamilika? Sasa leo amepata wa kumkamilisha!

Kwa hiyo wewe ambaye ulikuwa unaona uko chini, kumbe uko juu. Wewe uliyekuwa unajiona mwembamba, kumbe ni mnene. Wewe uliyekuwa unajiona mfupi kumbe ni mrefu. Wewe uliyekuwa unajiona maskini kumbe ni tajiri. Wewe uliyeambiwa una uso mbaya kumbe una uso mzuri. Kwa maana faili limerejea.

KANISA HILI LINAFUNULIWAJE?

Kanisa la kweli lisilo na mawaa wala kunyanzi linafunuliwaje?

Katika Mt.16:18 neno linasema “... nami nakuambia wewe Petro, na juu ya mwamba huu nitalijenga Kanisa langu na malango ya kuzimu hayatalishinda”! Lakini Kanisa hili Warumi walilikamata kwa sababu kaburi la Petro liko kwa Warumi. Baada ya YESU kutamka hilo Neno basi ikawa walipofanikiwa kumuweka Petro msalabani, miguu juu kichwa chini, Kanisa hilo mpaka leo halijaonekana.

Lakini pia walipofanikiwa kumpeleka msalabani YESU, na Askari wa Kirumi akamchoma mkuki, pakatoka maji na damu katika Yn.19:34, basi kauli hii na Kanisa hili lililotambulishwa kwa mara ya kwanza, halikuonekana tena! Tulichokuwa tunakiona ni dini na madhehebu.

Katika Mdo.11:26 Neno la MUNGU linasema “hata alipokwisha kumuona … wakakusanyika pamoja na wanafunzi waliitwa Wakristo kwa mara ya kwanza ...”. Hapa Kanisa lilitambulishwa kwa mara ya pili, na anayeongelewa hapo ni Mtume Paulo ambaye alipokea wokovu katika Mdo.9, na katika Mdo.13 tunaona akiitwa kwenda kila mahali. Kanisa hili pia lililotambulishwa kwa mara ya pili na Mtume Paulo, lilitekwa nyara na dunia. Hatukuliona tena, ila tunasoma juu ya makanisa saba ya Asia ambayo ukisoma katika Ufu.2&3 tunaona yote siyo makanisa bali ni dini. Isipokuwa lile la Filadelfia, ambalo nalo Neno linasema lilikuwa na Neno kidogo, hivyo likafifia.

Kwa mara ya tatu katika kitabu cha Mt.21:40 “ ... basi atakapokuja yule BWANA wa shamba la mizabibu atawatendaje wale wakulima? Maana tukisoma katika kitabu cha Mt.21:34-35 tunaona habari za MUSA, Mt.21:36 tunaona habari za Eliya Mtishbi, Mt 21:37-39 tunaona habari za YESU Kizazi cha Tatu.

Katika Mt.21:40 ni habari za Eliya Ad2 MUNGU wa Majeshi, maana ndiye aliyekuja Kizazi cha Nne akiwa amemleta MUNGU, akalitambulisha Kanisa kwa mara ya tatu. Ile siku ambapo tulianza miaka 1000 ya kutawala na Kristo akasema Siku 1, Wiki 1, Mwezi 1, na Mwaka 1. Lakini pia sura halisi ya Kanisa lisilo na mawaa wala kunyanzi, halikuonekana kwa kuwa tulikuwa bado tunashitakiana, tulikuwa bado tunanyosheana vidole, tulikuwa bado tunatukanana bila aibu na kupigana ngwala.

Kanisa ambalo MUNGU analifunua sasa halina mawaa wala kunyanzi, mahali pasipo na mauti wala kifo. Mahali ambapo faili la kila mwenye haki la hatma njema limerejea.

Kwa hiyo, nataka ujue kwa nini ujumbe huu umekuja leo. Katika Mt.21:34-39 tunazungumza juu ya Israeli ya mwilini, ambako ndipo MUSA, Eliya Kizazi cha Pili na YESU walipokuwa, waliopokea maagizo matatu kwa vizazi vitatu vya kwanza. Ile injili iliyotoka mashariki ya kati (Israeli ya mwilini), ikaenda Ulaya, ikaenda Amerika, ikaja Afrika na Asia, ilikuwa ni feki. Ufunuo utakaotoka hapa kwenda sehemu nyingine ndiyo wa kweli.

Mara nyingi unapozungumzia dini na madhehebu ya Kikristo, si mara nyingi utasikia Israeli ya mwilini inazungumzwa. Nimesema hivi, unapozungumzia RC unasema juu ya Urumi wala huzungumzii Israeli ya mwilini; ukizungumzia Anglican unasema juu ya Uingereza wala huzungumzii Israeli ya mwilini; ukizungumzia Assemblies of God unasema juu ya Amerika wala siyo Israeli ya mwilini. Ukizungumzia KKT unasema juu ya Ujerumani, wala siyo Israeli ya mwilini. Ukizungumzia Pentekoste, unasema juu ya Sweden / Scandinavia wala siyo Israeli ya mwilini. Ukizungumza Greek Orthodox au Presbyterian, unasema juu ya Uyunani wala siyo Israeli ya mwilini.

Israeli ya mwilini walishasahaulika kwa sababu ya Injili iliyokuwa feki yenye misingi mibaya. Ninachosema leo, limekuja faili la haki ya taifa hili kufunua Kanisa la Kweli lenye Agizo la Kweli! Kwa hiyo kuna kazi tunayotakiwa kufanya ili na sisi tusisahaulike, tusije na sisi tukafunua dini au dhehebu badala ya Kanisa.

Tutambue jambo moja, kwamba kuna Makuhani ambao tumewatuma kule nje ya nchi, wao wamesajili Kanisa siyo dini. Lakini wanahangaika sana kwa sababu Neno katika Mt.21:41 lilikuwa bado halijatimia.

Ndiyo maana walioko nje walikuwa wanafanya kazi kwa ugumu kwa sababu sisi tulikuwa bado hatujasajili Kanisa.

Hapa hatuwezi kukwepa kugaragara kwa siku saba. Kila mmoja leo akitoka hapa, kwa kuwa amepata zawadi, maana MUNGU hawezi kukupa zawadi bure, anataka akupe kazi. Ili hawa tuliowatuma kwenye mataifa, wasitaabike, leo tumwambie MUNGU tunatoka vitandani kwa siku 7. Ila wale ambao mumeolewa na akina baba ambao hawajaokoka msitoke kitandani, maana watawashangaa. Lakini wewe ambaye kichwa wako ameokoka, na wewe kichwa ambaye kanisa wako ameokoka, utoke kitandani kwa siku saba kuanzia leo. Ili Faili la Haki ya Taifa hili kufunua Kanisa la kweli lionekane waziwazi ndani ya siku 7. Nataka niwaapie leo, ukiona faili hili umelipokea, utashangaa jinsi ambavyo uchumi utavyobadilika kuwa mzuri kuanzia wa kaya, kijiji, kata, tarafa na wa kila aina. Kila kitu ambacho tumewahi kutafuta lazima tukione! Kila uzuri ambao tumewahi kuutafuta lazima tuuone!

Mataifa mnayoona yameendelea, yalikuwa na haki ya kuzaa dini na madehebu. Ukiona Uarabuni wanaringa ni kwa sababu walizaa dini. Ukiona Ulaya wanaringa ni kwa sababu walizaa dini. Ukiona Amerika wanaringa ni kwa sababu walizaa dini.

Sisi siyo dini, ni Kanisa ambalo tutashangaza Uumbaji wote! Hizi “struggle” tunazoziona (yaani haya mahangaiko mnayoyaona, hamtayaona tena) hatutaziona tena.

Kwa sababu MUNGU atakuja akae mzima mzima! Na mataifa ambayo tumepeleka Kanisa, vita dhidi ya Kanisa itakwisha. Umasikini utakwisha, na wale makuhani hawataishi tena maisha ya shida.

Sasa imekuwa tatizo, wakati mwingine wanaomba masaada huku; wakati mwingine wanaomba chakula kutoka huku, wakati ambapo huu siyo msingi wa Kanisa. Naona kama na sisi tunataka kuanzisha umisionari. Maana wanakwenda kule halafu wanaomba msaada huku, ina maana wale wasibarikiwe. Sisi hatujapeleka jambo hilo (yaani umisionari). Lakini kinachosababisha wahangaike, ni kwa sababu sisi bado tulikuwa hatujafunua hilo faili la haki ya taifa hili kufunua Kanisa la Kweli la Aliyetuma wote Vizazi vyote, linalotekeleza maagizo yote ya MUNGU!

HITIMISHO

Unaelewa kwa nini leo MUNGU amekupa zawadi? Kwa wale waliowahi sana, leo MUNGU ametupa zawadi ya faili la Hatima njema na tunaondoka na faili la zawadi hiyo ambayo unatakiwa ukaifanyie kazi kwa siku 7 ukiwa chini, yaani utoke kitandani upumzike chini.

FAILI LA HAKI YA GOSHENI KUFUNUA KANISA LA KWELI KWA MARA YA KWANZA NDANI YA UUMBAJI WOTE